FasnachtART 2021

Für d ART-Fasnacht 2021 ä bsunders Danggschöön
 

Wenns am Sunntig fünfi schloot

und niene im Dorf s Liecht usgoot,

denn finde mir das bireweich,

sin truurig, s git kei Morgestreich.

Am Nomidaag hets kei Wölggli am Himmel,

in dä Stroosse gseesch kei Massgegwimmel,

d Clique, d Gugge und au d Wääge

bliibe dehei und hogge uf dä Stääge.

S Fasnachtshäärz cha das gar nit verstoo,

Corona het dä Schwellemer d Fasnacht gnoo.

Zum Glügg gits, das isch fänomenal,

die erschti Allschwiler Revue Total,

das Äxtrablatt vom 5. Hoornig isch persee

ä tolli Sach, ä Glanzidee.

In däm Joor duet uns bsunders fasziniere,

d Hüüser und d Gemeinirabatte duet mä dekoriere

und ab em Schmutzige Donnschtig gosch mit dim Daggel

bis zum Lindeplatz uf dr Fasnachtsgwaggel.

Au am Obe spoot, was wotsch no mee

chasch die fasnächtliche Installazioone gsee.

Die apaartigi FasnachtART zeigt in voller Pracht,

d Frau Fasnacht isch trotz Corona an dr Macht.

Au d Dorfbänggler löön sichs nit lo nää,

si hän per QR Code d Väärs zum Beschte gää

und zum Abschluss, mit Hüüle und Schwung,

schtuunsch über ä Video vo dr Fasnachtsbeäärdigung.

Dä Fasnachtsgeischt het uns bsunders gfalle,

häärzlich Danggschöön seit d WVC drum alle,

fürs Mitmache und s Beschträäbe

in däm bsundere Joor d Fasnacht z belääbe.

Au d Hilff vom Gmeinroot und dr Verwaltig

sin wie immer ganz gewaltig,

drum gilt an dr ART-Fasnacht, äs isch ä soo,

s Motto „Zämme heebe – zämme stoo“.

Jetz isch d ART-Fasnacht verbi,

doch dr Wegger lütet gli,

bis zum näggschte Joor im Hoornig,

denn isch d Wält wider in Oornig.

d Chrutstorze
Wildviertel-Clique Allschwil

   

PDF-DokumentMedienmitteilung vom 25.01.2021

PDF-DokumentMedienmitteilung vom November 2020

Fasnachtszytig 2021

PDF-DokumentFasnachtszytig

fasnachtszytig@bluewin.ch

Für Fragen bitte Kontaktformular ausfüllen >

Fasnachtstermine vergangener Fasnachten findet ihr hier >